Այս կայքն արտացոլում է իրավիճակը իր մեկնարկի՝ 2023թ. օգոստոսի դրությամբ: Ինը ամիս տևած համակողմանի շրջափակումից և շարունակական ահաբեկումից հետո, 2023թ. սեպտեմբերի 19-ին Ադրբեջանի զինված ուժերը, գործածելով իրենց տիրապետության տակ եղած ողջ զինանոցը, բոլոր կողմերից հարձակվեցին Արցախի վրա: Երկարատև շրջափակումից հյուծված և որևէ արտաքին աջակցությունից զրկված` Արցախն ընկավ: 2020թ. արյունալի պատերազմին հաջորդած շուրջ հիսուն հազար արցախցիների արտագաղթից հետո իրենց նախնիների հողում դեռևս ապրող հարյուր հազարից ավելի հայ բնակչությունը ստիպված եղավ լքել հայրենիքը՝ թշնամուն թողնելով իր տներն ու աշխատավայրերը, պետական և առևտրային շենքերը, եկեղեցիները, վանքերը, գերեզմանները, հուշարձանները և ողջ ունեցվածքը: 2023թ. հոկտեմբերի սկզբից սկսած, Արցախի հազարամյա պատմության մեջ առաջին անգամ, Արցախում՝ հայկական հողում, հայեր չեն ապրում: |
Պատմությամբ, մշակույթով և իր բնական գեղեցկությամբ հայտնի Արցախը որևէ մեկ կայքով, գրքով կամ ֆիլմով իրատեսական չէ ներկայացնել: Հայաստան աշխարհի այս ոչ մեծ երկրամասում բազմազան են տեսարանները և անհաշիվ՝ գեղատեսիլ վայրերը, բազմաթիվ են պատմական և ճարտարապետական առումով նշանակալից կառույցները, խիստ հետաքրքիր և ներկայանալի են բնակիչները: Արցախի յուրաքանչյուր բնակավայր վստահաբար արժանի է ներկայացման և ունի աշխարհին հպարտությամբ ցույց տալու արժեքներ: Տարբեր կոթողներ, վայրեր և շինություններ, որ ներառված չեն այս բաժնում, պատկերված և նկարագրված են կայքի այլ բաժիններում:
Յուրաքանչյուր վարչական շրջանից ընտրողաբար այս բաժնում ներկայացվող նյութի նպատակն է ընդհանուր պատկերացում տալ ընթերցողին մեր հրաշալի երկրի մասին և խրախուսել անձամբ և խորությամբ ուսումնասիրելու այն: Իհարկե, նաև ցույց տալ երկրի անսահման գեղեցկությունը: